سیدنا عبداللہ بن عباس رضی اللہ عنہما سے روایت ہے کہ انصار کا ایک شخص مسلمان ہوا، پھر وہ مرتد ہو کر مشرکین سے جا ملا، پھر اسے ندامت ہوئی تو اس نے اپنی قوم کی طرف پیغام بھیجا کہ رسول اللہ صلی اللہ علیہ وسلم سے دریافت کریں کہ کیا میرے لیے توبہ کی کوئی صورت ہے؟ تو یہ آیات نازل ہوئیں ﴿كَيْفَ يَهْدِي اللَّهُ قَوْمًا كَفَرُوا بَعْدَ إِيمَانِهِمْ وَشَهِدُوا أَنَّ الرَّسُولَ حَقٌّ وَجَاءَهُمُ الْبَيِّنَاتُ﴾ سے ﴿إِلَّا الَّذِينَ تَابُوا مِنْ بَعْدِ ذَلِكَ وَأَصْلَحُوا فَإِنَّ اللَّهَ غَفُورٌ رَّحِيمُ﴾ [سورة آل عمران: 86 - 89] تک، راوی کہتے ہیں کہ اس کی قوم کے لوگ اس کے پاس آئے تو وہ دوبارہ مسلمان ہو گیا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب الحدود/حدیث: 8291]

سیدنا فرات بن حیان رضی اللہ عنہ سے روایت ہے وہ (فرات بن حیان) ابوسفیان کے جاسوس اور (مشرکین کے) حلیف تھے اور رسول اللہ صلی اللہ علیہ وسلم نے انہیں قتل کرنے کا حکم دیا ہوا تھا، وہ انصار کی ایک مجلس کے پاس سے گزرے تو کہا: میں مسلمان ہوں، تو رسول اللہ صلی اللہ علیہ وسلم نے فرمایا: ”تم میں ایسے لوگ بھی موجود ہیں جنہیں ہم ان کے ایمان کے سپرد کرتے ہیں، فرات بن حیان بھی انہیں میں سے ایک ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب الحدود/حدیث: 8292]

سیدنا عبداللہ بن عباس رضی اللہ عنہما سے روایت ہے کہ (مدینہ میں) بنو قریظہ اور بنو نضیر دو قبیلے تھے، بنو نضیر کو بنو قریظہ پر فوقیت حاصل تھی، چنانچہ جب بنو قریظہ کا کوئی شخص بنو نضیر کے کسی آدمی کو قتل کر دیتا تو اس کے بدلے اسے قتل کر دیا جاتا، لیکن جب بنو نضیر کا کوئی شخص بنو قریظہ کے کسی آدمی کو قتل کرتا تو قصاص کے بجائے اس کی دیت سو وسق کھجور مقرر تھی، جب نبی کریم صلی اللہ علیہ وسلم مبعوث ہوئے تو بنو نضیر کے ایک شخص نے بنو قریظہ کے ایک آدمی کو قتل کر دیا، انہوں نے مطالبہ کیا کہ اسے ہمارے حوالے کرو تاکہ ہم اسے قصاص میں قتل کریں، انہوں نے کہا: ہمارے اور تمہارے درمیان نبی کریم صلی اللہ علیہ وسلم فیصلہ کریں گے، وہ آپ صلی اللہ علیہ وسلم کے پاس آئے تو یہ آیت نازل ہوئی: ﴿وَإِنْ حَكَمْتَ فَاحْكُم بَيْنَهُم بِالْقِسْطِ إِنَّ اللَّهَ يُحِبُّ الْمُقْسِطِينَ﴾ [سورة المائدة: 42] اور انصاف (قسط) یہ ہے کہ جان کے بدلے جان لی جائے، پھر یہ آیت نازل ہوئی: ﴿أَفَحُكْمَ الْجَاهليَّةِ يَبْغُونَ﴾ [سورة المائدة: 50] ”کیا یہ جاہلیت کا فیصلہ چاہتے ہیں؟“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب الحدود/حدیث: 8293]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے فرمایا: ”کسی مسلمان کا خون حلال نہیں مگر تین صورتوں میں: شادی شدہ زانی، اسے رجم کیا جائے گا، اور وہ شخص جو جان بوجھ کر کسی کو قتل کرے، اسے قصاص میں قتل کیا جائے گا، اور وہ شخص جو اسلام سے نکل جائے اور اللہ اور اس کے رسول سے برسرِ پیکار ہو، اسے قتل کیا جائے گا یا سولی دی جائے گی یا اسے جلا وطن کر دیا جائے گا۔“
یہ حدیث شیخین کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الحدود/حدیث: 8294]

سیدنا انس بن مالک رضی اللہ عنہ سے روایت ہے کہ نبی کریم صلی اللہ علیہ وسلم نے عرینہ والوں کی آنکھیں اس لیے پھوڑیں کیونکہ انہوں نے مسلمان چرواہوں کی آنکھیں پھوڑی تھیں۔ [المستدرك على الصحيحين/كتاب الحدود/حدیث: 8295]

سیدنا انس بن مالک رضی اللہ عنہ سے اسی کے مثل روایت مروی ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب الحدود/حدیث: 8296]

سیدنا سمرہ بن جندب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو اپنے غلام کو قتل کرے گا ہم اسے قتل کریں گے، اور جو اپنے غلام کا کوئی عضو (ناک، کان وغیرہ) کاٹے گا ہم بھی اس کا عضو کاٹیں گے۔“
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الحدود/حدیث: 8297]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو اپنے غلام کو قتل کرے گا ہم اسے قتل کریں گے، اور جو اپنے غلام کا کوئی عضو کاٹے گا ہم اس کا عضو کاٹیں گے۔“
امام حاکم فرماتے ہیں کہ مجھے اندیشہ ہے کہ عثمان بن ہیثم نے اس سند سے وہی روایت بیان کرنے کا ارادہ کیا ہے جو یزید بن ہارون نے بیان کی تھی، واللہ اعلم۔ [المستدرك على الصحيحين/كتاب الحدود/حدیث: 8298]

سیدنا سمرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے اپنے غلام کو خصی کیا «أَخْصَى» ہم بھی اسے خصی کر دیں گے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب الحدود/حدیث: 8299]

سیدنا عبداللہ بن عباس رضی اللہ عنہما سے روایت ہے کہ ایک لونڈی سیدنا عمر بن خطاب رضی اللہ عنہ کے پاس آئی اور عرض کی: میرے مالک نے مجھ پر تہمت لگائی اور مجھے آگ پر بٹھا دیا یہاں تک کہ میری شرمگاہ جل گئی۔ سیدنا عمر رضی اللہ عنہ نے پوچھا: کیا کسی نے تمہارے ساتھ یہ ہوتے دیکھا؟ اس نے کہا: نہیں۔ پوچھا: کیا تم نے اس کے سامنے کسی جرم کا اعتراف کیا؟ اس نے کہا: نہیں۔ سیدنا عمر رضی اللہ عنہ نے حکم دیا: اسے میرے پاس لاؤ۔ جب وہ شخص آیا تو آپ نے فرمایا: کیا تو اللہ کے عذاب جیسی سزا دیتا ہے؟! اس نے کہا: اے امیر المؤمنین! مجھے اس کے کردار پر شک تھا۔ آپ نے پوچھا: کیا تم نے اسے کچھ کرتے دیکھا؟ اس نے کہا: نہیں۔ پوچھا: کیا اس نے اعتراف کیا؟ اس نے کہا: نہیں۔ تب سیدنا عمر رضی اللہ عنہ نے فرمایا: اس ذات کی قسم جس کے قبضے میں میری جان ہے! اگر میں نے رسول اللہ صلی اللہ علیہ وسلم کو یہ فرماتے ہوئے نہ سنا ہوتا کہ: «لَا يُقَادُ مَمْلُوكٌ مِنْ مَالِكِهِ، وَلَا وَلَدٌ مِنْ وَالِدِهِ» ”غلام سے اس کے مالک کے بدلے اور اولاد سے اس کے والد کے بدلے قصاص نہیں لیا جائے گا“، تو میں تجھ سے اس لونڈی کا قصاص ضرور لیتا۔ پھر آپ نے اسے سب کے سامنے کھڑا کر کے سو کوڑے لگوائے اور لونڈی سے فرمایا: جا، تو اللہ کی رضا کے لیے آزاد ہے، اور تو اللہ اور اس کے رسول کی آزاد کردہ «مَوْلَاةُ» ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب الحدود/حدیث: 8300]